நிசங்களின் காடு

வழிதடங்கள் யாவும்

முற்றிலும் சிக்கலானவை

எளிமையான வினொதங்களையுடையவை

நிசங்களின் காட்டில் உலவுதல்

மெய்யர்களுக்கெ சாத்தியம்.

அவர்களுக்கே தெரியுமதன் இருள் கவிந்த

ரகசிய பாதைகளும் மர்மத் தடங்களும்

காடு புதர்கள் மண்டியதோ இல்லையோ

புதிர்கள் மண்டியது.

கடப்பவரை விழுங்கிச் செரித்திடும்

புதைகுழிகள் ஏராளம்

தன் புதிர் முகத்தினை மட்டுமே

காட்டிடும் காடு எல்லா பொழுதுகளிலும்

எல்லையைக் கண்டவர் எவருமில்லை

கண்டவர் விண்டிலர் விண்டவர் கண்டிலர்.

குறிப்பு : இக்கவிதையை வெளியிட்ட வல்லமை (04-03-13)

மின்னிதழுக்கு நன்றி. 

பிரதிநிதி

குழப்பங்கள் கருக்கொண்டு பிரசவித்த

சூன்யத்தினுள் கரைந்தபடி காலம்

தொப்புள்கொடி அறுபடும் முன்னரே

தாயையிழந்த பிஞ்சாய்

பற்றிக் கொள்வதற்கோரு விரல் தேடி

வீறிடுகிறது வறண்ட மனம்

பலநூறு பகலவனாய் சுட்டெரிக்கின்றன

இயலாமைகள் என் ஆகாயத்தை

ஏங்கித் தவிக்கின்றன

என் பாலைவன ஏக்கங்கள்

நிசியிலுறங்கா ஓநாயின் ஓலத்தோடு

கரைகிறதென் கதறல்

அருகிலிருக்கும் அரவத்தின் கிசுகிசுப்பில்

பயந்து ஒடுங்குகிறதென் சுயம்

என்னுடைய வாழ்வை

என் பயங்கள் வாழ்கின்றன.

குறிப்பு : இக்கவிதையை வெளியிட்ட திண்ணை (03-03-13)

இணைய இதழுக்கு நன்றி. 

பூக்களுதிர் காலம்

நீண்டு நெளிந்து செல்லும்
குருதிப் புனலில் குளித்தெழுகிறது
இத்தரணி
பூக்கள் நிறைந்த வனத்தில்
ஒவ்வொரு அநியாயத்திற்கும்
ஒவ்வொரு வஞ்சனைக்கும்
ஒவ்வொரு குரோதத்திற்கும்
ஒவ்வொரு காழ்ப்புக்கும்
ஒவ்வொரு துரோகத்துக்கும்- சிந்தும்
ஒவ்வொரு அப்பாவியின் துளி இரத்ததிற்கும்
ஒவ்வொரு பாவத்திற்கும்- வடிக்கும்
ஒவ்வொரு துளி ஏழையின் கண்ணீருக்கும்
ஒன்றென்ற கணக்கில் உதிரத் துவங்கின.
மெல்லத் துவங்கியது தரணியின்
பூக்களுதிர் காலம்
உதிர்ந்து கருகிய பூக்களின் சாம்பலுக்கிடையே
முட்டித் துளிர்த்தது
நட்பெனும் ஒரு பூ
வையம் பூக்களின் காடானது
மீண்டும்.

குறிப்பு : இக்கவிதையை வெளியிட்ட வல்லமை ( 01-03-13)
மின்னிதழுக்கு நன்றி.